नापिकीला कंटाळून शेतकऱ्याची आत्महत्या

नापिकीला कंटाळून शेतकऱ्याची आत्महत्या

वरोरा तालुक्यातील सुमठाणा येथील शेतकऱ्याने नापिकीला कंटाळून विष प्राशन करून आत्महत्या केली. विनोद शत्रुघ्न दडमल (४२) असे मृतक शेतकऱ्याचे नाव आहे. मृतक शेतकऱ्याने २६ मार्चला विष प्राशन केले होते. उपचारादरम्यान २७ मार्चला पहाटे ३ वाजताच्या सुमारास चंद्रपूर जिल्हा सामान्य रुग्णालयात त्याचा मृत्यू झाला.

वरोरा तालुक्यातील सुमठाणा

येथील शत्रुघ्न दडमल यांना विनोद व प्रमोद अशी दोन मुले आहे. वृद्धावस्थेमुळे शत्रुघ्न दडमल यांच्याकडे असलेल्या पाच एकर शेतीपैकी प्रत्येकी अडीच एकर शेती प्रमोद व विनोद यांना दिली होती. विनोदच्या वाट्याला आलेल्या अडीच एकर शेतीमधील उत्पन्नावर तो कुटुंबाचा उदरनिर्वाह करीत होता. परंतु, गेल्या काही वर्षापासून त्याला या शेतीतून फारसे उत्पन्न होत नव्हते. तसेच जंगल व तलावालगत असलेल्या या शेतीमध्ये वन्यप्राण्यांच्या हैदोसाने देखील शेतपिकाचे अतोनात नुकसान झाले होते. प्रत्येक वर्षी वडील पीक कर्ज काढून दोन्ही भावांमध्ये समान वाटप करीत होते. त्यांनी या वर्षीच्या हंगामात १ लाख ६५ हजार रुपये पीक कर्ज

उचलले होते. यापैकी अर्धी रक्कम विनोदला व अर्धी रक्कम प्रमोदला त्यांनी दिली होती. ३१ मार्चपूर्वी पीक कर्ज भरायचे असताना विनोदकडे पीक कर्ज भरण्याकरिता रक्कम जमा होऊ शकली नाही. नापिकी व कर्जामुळे तो गेल्या काही दिवसांपासून आर्थिक विवंचनेत होता. याचदरम्यान २६ मार्चला दुपारी तीन वाजताच्या सुमारास घरी कोणीही नसल्याची संधी साधून त्याने विष प्राशन केले.

सदर घटनेची माहिती होताच नातेवाईकांनी त्याला वरोरा उपजिल्हा रुग्णालयात उपचाराकरिता दाखल केले. प्रकृती चिंताजनक असल्याने चंद्रपूर जिल्हा सामान्य रुग्णालयात त्याला पाठविण्यात आले. दरम्यान, २७ मार्च रोजी पहाटे तीन वाजताच्या सुमारास उपचारादरम्यान त्याचा मृत्यू झाला. त्याच्या पश्चात आई-वडील, पत्नी व मुलगा असा परिवार आहे. विनोदच्या आत्महत्येचे नेमके कारण कळू शकले नसले तरी कर्जबाजारीपणातून त्याने आत्महत्या केल्याची शक्यता वर्तवली जात आहे. घटनेचा तपास शेगाव (बु) पोलीस करीत आहे.